चार दिनदेखि छट्पटाइरहेकी गर्भवतीको उद्धार [फोटोसहित]

असार ११, २०७४- चार दिनदेखि सुत्केरी व्यथाले छट्पटाइरहेकी बाजुराको गोत्रीकी गर्भवतीलाई आइतबार विहान उपचारका लागि हेलिकोप्टरद्वारा नेपालगञ्ज पुर्‍याइएको छ । बाजुरा सदरमुकाम मार्तडीदेखि कम्तीमा दुई दिनको दूरीमा पर्ने साविकको गोत्री गाविस–७ मा विपन्न दलित परिवारकी ४१ वर्षीया फुलटुका ढोली सुत्केरी हुन नसकेर छट्पटाइरहेकी थिइन् । ज्यानै जोखिममा पुगेको खबर पाएपछि जिल्ला स्वास्थ्य कार्यालयको पहलमा आइतबार बिहान सिम्रिक एयरको हेलिकोप्टर गाउँमै अवतरण गराएर नेपालगञ्ज पठाइएको जिल्ला कार्यालयका प्रमुख डा. रुपचन्द्र विश्वकर्माले बताए । फुलटुकालाई बिहीबार सुत्केरी ब्यथा सुरु भएको थियो । एक दिन घरमै पर्खंदा सुत्केरी हुन नसकेपछि उनका पति जयलाल ढोलीले दोस्रो दिन हुनी स्वास्थ्य चौकी पुर्‍याएका थिए । स्थानीय स्वास्थ्य चौकीका स्वास्थ्यकर्मीले प्रसूति गराउन नसकेर रिफर गरेका थिए । तर उनलाई अन्यत्र लैजान पारिवारिको आर्थिक अवस्था कमजोर भएकाले त्यही थन्किएकी थिइन् । फुलटुकाको यो छैटौं गर्भ हो । ‘हाम्रो पहलमा परिवार स्वास्थ्य महाशाखाले ४ लाख ५० हजार आर्थिक सहयोग गर्ने आश्वासन दिएपछि फुलटुकाको उद्धार सम्भव भएको हो’, जिल्ला स्वास्थ्य कार्यालयकी परिवार नियोजन सुपरभाइजर दुर्गा बजगाईले भनिन् । गर्भवतीलाई उद्धार गर्न निर्वाचन सुरक्षाका लागि खटिएका नेपाली सेनालगायत सुरक्षाकर्मी, स्थानीय बासिन्दालगायतले सहयोग गरेका थिए ।